【Emily】港航送學校千張機票 可去京滬要交計劃書

【明報專訊】俗語話「讀萬卷書不如行萬里路」，香港航空噚日開展新一屆「擁抱世界」學生贊助計劃，送出1000張由機管局贊助嘅免費來回機票，期望鼓勵學生外遊學習，適用於北京同上海航班，先到先得。

根據計劃嘅網頁，申請嘅學校需要構思一項課外活動同埋提交計劃書，主題可圍繞中國歷史與文化、創新與科技同公共與社會發展等，形式不限；完成旅程後一個月內，學校需要製作旅遊短片及遊記，展示學生交流經歷同相關活動。

港航話，計劃今年踏入10周年，相隔5年再次重啟，期望令更多中、小學生受惠。睇番舊時資料，贊助方式都略有唔同，例如2016年嘅1100張機票，連大學同社福機構都可以參加，航點包括內地、日本、澳洲等；2017年就「加碼」派1800飛，可乘搭任何港航嘅自營航線，包括美國洛杉磯、三藩市。