【Emily】「夜屯園」市集 小黃鴨撐場

【明報專訊】政府搞「18區日夜都繽紛」活動，喺剛過嘅周末，屯門文娛廣場有一連三日嘅「夜屯園」懷舊市集，入夜後場內人潮如鯽，美食攤檔排長龍，場內仲有多件霓虹燈裝置藝術品，畀市民打卡。經民聯立法會議員林健鋒同阿仔林凱章上周末都一齊去趁熱鬧。

市民鍾意 林健鋒話好滿足

林健鋒家族經營玩具廠，佢爸爸當年生產嘅小黃鴨膠公仔成為經典，佢哋今次都支持夜市，將小黃鴨化身成為可愛裝置，放喺市集畀市民影相。林健鋒心情大好，話見到市民同旅客不斷打卡，佢哋都覺得好有滿足感。

實政圓桌田北辰係當區立法會議員，有去捧場，並拍片放上社交媒體，呼籲街坊支持。田二少話，市集有唔少飲食攤檔，佢買咗一塊特厚豬肉乾，話真材實料，而佢最滿意嘅係攤位全部都有提供電子支付，八達通一「嘟」就搞掂，認為咁先係方便大家消費。