【Emily】羅健熙跑步半年 盼日後出埠比賽

【明報專訊】民主黨主席羅健熙因2019年理大衝突案被控非法集結，被裁定無罪後律政司不服上訴，案件將於11月20日審理。正在保釋、需交出旅遊證件嘅羅健熙就喺facebook分享，過去半年建立咗跑步習慣，希望日後可以離境時，能夠出外參加長跑比賽同旅行。

律政司前年就羅健熙嘅無罪裁決以案件呈述方式提出上訴，案件最新排期於今年11月20日喺高等法院上訴庭審理。羅健熙噚日喺fb發文，話近期建立跑步習慣，過去半年已經跑咗超過600公里。羅健熙提到暫時未參加過長跑比賽，但一直留意海外賽事，希望日後可以離境時能夠出外比賽，順便旅行遊覽，不過最好避免參加全馬，否則跑完就行唔到街、去唔到景點。

羅健熙話，後生時有做運動，但好唔鍾意跑步，覺得好悶、無聊同辛苦，?家認為跑步限制少、比較自主，感慨如果近年無面對急劇轉變，佢都未必有心機同時間去做運動。