【Emily】林天福任機管局主席 現職CEO請緊接任人

【明報專訊】機管局有新人事安排，政府噚日宣布委任由2014年起任職行政總裁、現年65歲嘅林天福（圖），接任下任機管局主席，6月1日生效，任期3年。至於林天福原來嘅行政總裁一職，機管局話董事會將即時開始全球招聘。

現年78歲嘅蘇澤光2015年6月上任機管局董事會主席至今，將於5月31日卸任；另外3名董事會成員趙式明、唐嘉鴻及黃冠文嘅任期亦同期屆滿。政府噚日公布委任3名新成員，包括陳阮德徽、龔楊恩慈、姚柏良，並再委任趙式明同唐嘉鴻。

蘇澤光5‧31卸任主席

機管局話歡迎政府嘅最新任命，運輸及物流局長林世雄喺新聞稿感謝蘇澤光過去9年嘅貢獻，話佢任內香港國際機場屢獲殊榮，客運同貨運方面均位處世界前列。

林世雄話林天福對機管局同香港國際機場事務瞭如指掌，期待日後同佢緊密合作，捉緊三跑系統建成同「機場城市」發展嘅契機，繼續推動香港國際機場長遠發展，積極向外宣傳同開拓商機，進一步提升香港國際航空樞紐嘅地位。