經濟
萬科總裁爆料：王石棄千萬退休金
【明報專訊】近年內房唔景氣，一眾老闆高層都要緊縮開支，好似萬科（2202）（深：000002）主席郁亮早前喺業績會公布，3月28日起每月人工降至1萬元人民幣。噚日，據內媒報道，在公司股東大會上，總裁祝九勝仲大爆，原來「因為萬科資金緊張，王石（圖）主動放棄2023年的千萬退休金了。」
王石的嫩妻兼前演員田樸珺則在微博上轉載有關「王石放棄萬科千萬退休金」的視頻新聞，仲大「撒狗糧」晒恩愛指「沒事，老王，我養你」，引來不少關注。
王石妻微博「撒狗糧」：我養你
其實作為萬科創始人兼董事會名譽主席嘅王石，自有名嘅「萬科爭奪戰」落幕後，已由2017年6月轉任為名譽主席至今，唔再擔任董事，亦唔參與公司治理，仲交埋主席棒畀郁亮。今次王石再公開放棄2023年嘅退休金撐萬科，令唔少A股人想念昔日萬科王石、郁亮嘅情誼及輝煌時光，希望萬科能成功渡過難關。
