【Emily】江玉歡為T4撥款夢見林世雄 倡效外國設獨立委會審核高價工程

【明報專訊】立法會財委會上周五通過造價68.1億元嘅沙田T4主幹路工程撥款，選委界別議員江玉歡（Doreen）投下反對票，批評當局解說工作。Doreen噚日喺facebook發文，話自己就撥款制度日有所思，夜晚發夢都見到運輸及物流局長林世雄，夢中一齊食下午茶傾工作。講番大型項目撥款，Doreen建議其實可參考外國設獨立委員會，審核高價撥款工程，令申請項目更具透明度、專業性及問責性。

指唔應該驚社會討論

Doreen話，可能因為T4撥款令佢深思撥款制度，所以甚少發夢嘅佢前晚竟然夢見林世雄一齊討論工程項目。Doreen指部分撥款項目經立法會通過後，市民仍有意見，強調唔應該害怕社會討論，就對項目嘅討論表面或簡單化，冀政府除咗「數票」，亦要改善撥款制度。佢建議仿效外國設獨立委員會把關，就大額撥款審視項目對社會及公共財政嘅影響，以至人口改變、碳排放、就業機會等因素。

同局長食tea只係發夢，Doreen噚日就趁星期日享受親子樂，由兒子帶佢到西灣河太安樓搵美食，品嘗咗特色漢堡包與花膠烏冬。佢話太安樓有唔少大排長龍嘅小店，形容食物有心思，「吃出愛心與溫度」。