【Emily】開業兩年半 民主黨員BOLD Coffee結業

【明報專訊】近月唔少餐廳話生意慘淡甚至結業，多名民主黨成員有份經營嘅餐廳「BOLD Coffee」同樣敵不過洪流，喺facebook宣布已經結業。帖文提到，近年嘅香港散聚係平常事，指餐飲業經營困難，「但我們仍然感恩曾經和大家相遇」。

話今日香港散聚平常事

位於深水埗、開業兩年半嘅「BOLD Coffee」前晚喺facebook發文宣布結業，感謝顧客一直支持，提到餐飲業經營困難，「對新手的我們而言跌碰挫敗也實在太多」。帖文表示喺今日嘅香港，散聚乃是平常，餐廳「見證著香港人的散聚分合」，相信只要堅持勇氣同埋對香港熱誠不變，「自然而然，換個方式都會繼續走下去」。

「BOLD Coffee」位處嘅深水埗基隆街一帶，售賣布料商店林立，餐廳因而以布藝為主題，希望傳承本土布藝文化。「BOLD Coffee」曾經舉辦分享會等活動，邀請過傳媒人區家麟等擔任嘉賓。