【Emily】對角過馬路試行 行人慳14秒不礙車流

【明報專訊】運輸署年初喺沙田沙角街與逸泰街交界試行「對角行人過路處」，近日向立法會提交文件，報告計劃嘅進度。署方喺啟用前及開始試用後，詳細觀察過呢個路口嘅行人過路同車流狀况，綜合觀察所得，大約有一半路人會對角過馬路，平均需時約19秒，較原本分兩段過對角嘅行人路大約慳咗14秒，亦可以行少17米。

至於車流方面，運輸署話事前已評估過車流，按測試後嘅實况，車輛嘅平均等候時間同以前相若。

運輸署話正進一步分析過去幾個月試行「對角行人過路處」嘅情况，以檢視同調整第二個位於尖沙嘴加拿分道與加連威老道交界嘅對角行人過路處試點設計，有關工程仲籌劃緊，預計今年中測試。署方會持續觀察兩個試點嘅運作約6至9個月，再檢討同調整有關設計，會因應試點結果考慮未來方向。