【Emily】無人機做飛行校驗 民航處：效彰零碳排

【明報專訊】無人機唔止識做騷表演，民航處呢幾日就利用小型無人機做咗一次飛行校驗測試，包括對機場北跑道嘅儀表着陸系統做飛行校驗，同埋對東龍島嘅多普勒甚高頻全向無線電信標同測距儀做部分飛行校驗測試。民航處話，測試證實無人機校嘅校驗結果同傳統校驗飛機所得嘅脗合。

民航處話，東龍島個儀器係為航機提供方向和距離資訊，協助航機喺飛行航路上導航；而比較傳統校驗飛機，利用小型無人機喺偏遠外站對導航儀器做部分飛行校驗，喺飛行調度上更靈活，執行效率更高，更實現咗零碳排放。

原來根據國際民航組織標準，機場地面嘅導航儀器係要定期做飛行校驗，確保儀器運作符合要求。香港機場嘅飛行校驗一直由國家民航局飛行校驗中心執行同驗證結果，民航處話為提升校驗效率，舊年8月做咗第一階段嘅無人機飛行校驗測試，證實用無人機喺跑道上對儀表着陸系統同跑道地面燈做部分飛行校驗係可行嘅。

民航處呢幾日做完第二階段測試後，話藉兩次成功測試經驗，會繼續加強同國家民航局飛行校驗中心等嘅合作，進一步研究點樣用小型無人機做部分飛行校驗。