【Emily】狄志遠議辦月蝕過萬 擬年底籌款

【明報專訊】新思維立法會議員狄志遠近日喺將軍澳寶林邨開設新嘅議員辦事處，佢透露計埋政府津貼後，各議辦開支每個月仍然虧損過萬元，要靠黨嘅支持。佢話新思維目前財政緊絀，約30萬元儲備只夠應付黨內一年營運支出，擔心之後要借貸度日，所以計劃年底舉辦籌款晚宴。

呻月租3000增至1.4萬

阿狄舊年喺將軍澳景林邨「插旗」開議辦，但原本房署轄下嘅單位今年分配畀新任區議員，所以議辦要搬去附近嘅寶林邨商場，「守住區內血脈」，繼續由新思維副主席崔定邦主力負責經營。阿狄噚日邀請傳媒到場參觀，大呻月租由3000幾大增至1.4萬元，各辦事處計埋政府津貼每月仍要虧損過萬元，加上黨內資金或喺一年後乾塘，所以考慮年底舉行籌款晚宴。

新思維舊年入唔到閘參選區議會，對於繼續經營地區辦事處係咪想再接再厲，崔定邦就話太長遠，?家着眼服務好街坊先。身兼旅遊促進會總幹事嘅佢提到將主力搞旅行團等康樂活動，一直大受居民歡迎，亦會關注回收設施等地區議題。