【Emily】立會東盟考察 搭中國第一條海外高鐵

【明報專訊】立法會考察東盟3國團由馬來西亞轉到印尼，參觀咗中國第一個海外高鐵——雅萬高速鐵路，大家大合照時，各人將隻手橫放胸前，帶隊嘅立法會主席梁君彥解釋，呢個係代表雅萬高鐵「快速瞬達」嘅手勢，又話當列車去到最高時速350公里時，考察團各人都不禁歡呼拍掌。

梁君彥話，印尼首架高鐵列車以「Whoosh」命名，就係模擬列車高速開動時嘅聲音，其串法係「省時、運作優化、系統可靠」嘅印尼文縮寫。

雅萬高鐵由中國和印尼合作興建，連接印尼首都雅加達和西爪哇省省會兼旅遊城市萬隆（Bandung），全長142公里；去年10月通車後，截至今年4月累計乘客超過256萬人次。

雅萬高鐵係「一帶一路」倡議嘅旗艦項目，梁君彥講到議員們登上列車，覺得有份特別親切感，原因係雅萬高鐵係首個廣泛使用中國鐵路系統、技術同工業部件嘅海外鐵路項目。

試坐完高鐵，考察團就同雅萬高鐵領導層分享香港高鐵嘅營運及管理情况，尋求未來同印尼喺高鐵營運合作嘅新機會。