【Emily】調查：海外遊客平均留港6.4日 多疫前1.1

【明報專訊】新冠疫情過後，全球「搶旅客」，香港都好努力搞「盛事經濟」、「夜經濟」，有議員就大推「體育經濟」，希望吸引更多過夜客。Mastercard經濟研究所最近公布年度報告，截至今年3月嘅過去12個月，海外旅客喺香港平均逗留6.4日，較2019年增加1.1日，而日本就成為全球第一大旅遊熱門目的地。

日本成全球最熱門旅遊目的地

報告透過匿名交易數據，分析74個市場未來嘅旅遊業演變。調查期間，日本以壓倒姿態，成為全球第一大旅遊熱門目的地，其後依次係愛爾蘭、羅馬尼亞、意大利、西班牙。報告分析，日圓走弱利好匯率，預期日本喺今年仍會保持明顯嘅旅遊優勢，惠及當地服務旅遊業同整體經濟。

研究所預期，日本仍會係今年暑假嘅熱門旅遊城市，但就唔係第一位，原因係德國慕尼黑6月會舉辦歐洲國家盃，相信到時會有好多球迷湧去當地；日本東京則緊隨其後，之後係阿爾巴利亞首都地拉那、法國尼斯等。