【Emily】城大中山大學合作育法律人才

【明報專訊】城市大學上個禮拜四（23日）同中山大學簽訂兩份合作協議，其中一份係為培養兼備內地同香港法律知識嘅人才，城大將會提供機會畀中山大學法學院嘅學生到校學習。城大校長梅彥昌話，期望兩校學生加強交流合作，「為內地和香港的法治建設作出貢獻」。城大法律學院院長林峰同中山大學法學院長張亮見證簽署。

雙方同日簽訂嘅另一份《戰略合作框架協議》，希望共同推動生命科學、數碼醫學、電腦科學、生物醫學工程等領域嘅發展，促進科學研究、科技轉化、人才培養同學者交流等方面嘅合作，由城大首席及常務副校長李振聲同中山大學附屬第七醫院院長何裕隆簽署。

梅彥昌話，城大4月正式成立數碼醫學研究院，推動生命健康科技同數據科學等，期望城大繼續發揮喺工程、數據科學同生命科學方面嘅科研實力，並透過結合中山大學附屬第七醫院喺醫學同臨牀方面嘅資源優勢，攜手推動醫療創新，為未來醫療發展作貢獻。

見證簽署嘅中山大學校長高松同城大代表交換多個專業領域嘅意見，包括醫學、新能源、法學、工商管理、生物醫學工程同研究生課程。