【Emily】教局邀1000中小生揮毫賀國慶

【明報專訊】教育局噚日去信全港中小學介紹「千人揮毫賀國慶」活動，希望邀請1000個中小學生以「共賀國慶」為主題即席揮毫。活動暫定今年9月14日喺灣仔會展舉行，到時學生會一齊寫祝頌語句，亦可以寫「中國語文課程建議篇章」嘅自選詩句，學生可獲精美紀念品同參與證書。

教育局話，喺中華人民共和國成立75周年之際，希望學生同賀國家昌盛繁榮，又提到活動目的係鼓勵學生多練習書法，通過書寫時專注一筆一畫，沉澱心靈、怡情養性，體會書法美感，並「建立健康的生活方式，培養對中華文化、藝術的興趣」。

局方歡迎每間學校提名10個學生同1名負責教師，或20個學生同兩名負責教師。學校今日（28日）早上9點起可以網上報名，6月11日下午5點截止，名額有限，先到先得。