【Emily】攝影泰斗鏡頭下香港 新聞博覽館辦「橋叔」專題展

【明報專訊】獲新聞同業尊稱「橋叔」嘅本地著名攝影記者陳橋上個月6號離世，享年96歲。位於中環必列者士街嘅香港新聞博覽館，舉辦「緬懷新聞攝影泰斗陳橋先生 鏡頭下香港歷史點滴」專題展覽，展出橋叔任職攝記時拍攝嘅經典相片，同埋作品背後故事，畀公眾深入了解橋叔透過鏡頭記載嘅香港歷史點滴。

展覽即日起畀公眾免費入場參觀，分為地下及1樓兩部分，地下展區介紹橋叔從小販到成為新聞攝影泰斗嘅經過，亦展示佢任職《南華早報》攝記嘅9張經典新聞相，包括1962年內地逃港潮一個家庭面對分離嘅一刻、1963年香港苦旱300名僧尼喺跑馬地馬場求雨嘅畫面等，部分仲獲得最佳新聞圖片殊榮。

參觀者可到1樓展區，了解經典作品背後嘅故事，同埋橋叔透過鏡頭記錄不同年代社會民生嘅新聞相片。展覽會播出橋叔喺2017年接受新聞博覽館專訪嘅片段，由佢分享昔日新聞攝影經歷及展示佢捐贈畀該館、2006年出版嘅《鏡頭下的歷史 陳橋三十載新聞圖片錄》。

新聞博覽館6月1日（周六）會舉行專題講座，邀請政府新聞處前助理處長譚錫揚、《南早》前採訪主任陳家耀同大家一齊回顧昔日與橋叔嘅工作點滴，講座會喺現場同網上同步舉行。