【Emily】內地出境遊滿意度 澳門第1香港第7

【明報專訊】中國旅遊研究院發表文章話，澳門今年第一季嘅內地出境旅客滿意得分係83.49分，躍升至第一位，首次獲內地出境旅遊者評為最滿意嘅目的地。至於去年以82.86分排喺第五嘅香港，今年首季跌到落第七，得81.77分。香港喺2017年曾經排喺第一，當年澳門排名第十。

2017年香港曾排第一

中國旅遊研究院話，澳門喺舊年嘅評分係84.09分，排喺第三，形容過去10年內地遊客對港澳嘅滿意度評價一直處於較高水平。研究院話，隨住內地赴港澳「個人遊」城市嘅擴展、簽注同通關便利化，同埋「澳車北上」等政策落實，澳門首次成為內地出境旅遊者最滿意嘅目的地。

研究院仲話，希望內地同港澳嘅相關部門，構建同完善服務質量同旅遊經濟監測運行體系，及時交換數據同溝通，研究「一地兩檢、單邊放行」、「一簽多行」等政策儲備。

澳門旅遊局話，好開心見到內地旅客嘅正面評價，未來會繼續聯動業界優化旅遊資源、接待能力同旅客體驗，展現澳門嘅旅遊魅力，共同推動綜合旅遊休閒業高品質同可持續發展，擦亮澳門國際大都市金名片，鞏固澳門世界旅遊休閒中心嘅地位。