【Emily】上海睇Formula E 民記搲重臨香江

【明報專訊】Formula E電動方程式賽車啱啱喺上海舉行，民建聯立法會議員陳克勤、劉國勳、李世榮同區議員姚銘周末去咗當地賽場，支持香港人投資、以中國車隊身分出賽嘅ERT車隊，佢哋同車隊管理層一齊觀賽，仲深入車隊準備嘅地方，了解車隊作賽嘅準備。

Formula E係以新能源驅動嘅純電動賽車作賽，但賽車動力都好強勁，賽事競爭激烈。香港亦曾幾次舉行Formula E，劉國勳話同咗國際汽車聯合會（FIA）代表交流，探索Formula E重返香港舉行嘅可能，佢都希望香港政府能積極推動，希望不久就可以見到Formula E重臨香江。

講開賽車，實政圓桌立法會議員田北辰喺立法會提出質詢，話自己2017年開始已經向政府建議欣澳填海起賽車場，批評政府究竟研究咗乜出來，話廣東省發改委剛提出，想喺廣州斥200億元興建一級方程式賽道同配套設施，香港再唔搞，就唔會夠其他城市競爭。

文體旅局長楊潤雄回應話，土拓署喺2023年5月展開欣澳填海工程嘅可行研究，預計2025年中完成，等填海範圍擬定後會探討土地用途。