【Emily】屈臣氏回收過期過剩藥物 保護環境

【明報專訊】唔少人都會喺屋企存放唔同藥物以備不時之需，不過過分囤積會造成浪費。屈臣氏近日同太平山青年商會合作推行「全港藥餘回收計劃」，聽日起至6月30日會喺全港接近60間遍佈18區嘅屈臣氏藥房設置藥餘回收箱，收集過期或過剩藥物，經註冊藥劑師點算後，會送去相關持牌服務商妥善銷毁。屈臣氏話咁樣可以避免因為藥物入面嘅化學成分流入土壤或水源，繼而對環境同人體健康產生不良影響，期望藉此向公眾宣傳正確處理家居藥餘嘅重要。

屈臣氏話，藥餘回收必須喺藥劑師當值時間進行，計劃只會回收藥丸，唔包括藥水同危險藥物（如嗎啡、興奮劑、催眠劑、安神劑及鎮靜劑等）。市民如果係易賞錢會員，計劃期間首次成功回收藥餘可以獲得100易賞錢積分。大家不妨趁呢個機會檢查一下家中藥箱喇。