【Emily】港星警方合作拍防騙片

【明報專訊】唔少網上情緣騙案都涉及跨境犯罪，香港警察最近首次同新加坡警察合作，製作咗一條防騙影片，片中香港警員同新加坡警員分別一路行一路FaceTime互相問候近况，點知香港警員喺維港海傍行行下，遇上一個男人喺度喊，於是掛斷電話上前關心，細問下先知對方陷入咗網戀騙局。

受騙嘅男人話之前喺WhatsApp識咗個女朋友，對方話為咗兩人將來，建議佢下載投資應用程式，男人話見到一直有賺錢，所以未有提取，點知想攞錢時就攞唔番，先知畀人呃，「我𠵱家冇晒啲錢，唔知點面對屋企人」。

片尾兩個警員呼籲大家保持警惕，一齊攜手打擊騙案。新加坡警察話近年全球飽受騙案影響，星洲相關騙案數字亦激增，建議市民懷疑受騙就應該聯絡警方。香港警察亦建議市民如有懷疑，可致電防騙易「18222」，亦可下載「防騙視伏App」。