【Emily】參選記協主席 提名人撤提名 透視報主編李敏妮止步

【明報專訊】香港記者協會將舉行執委會換屆選舉，參選報名噚日傍晚截止，記協公布收到兩人報名參選主席、一人參選副主席、13人參選理事，而其中一個參選主席嘅人因為提名人撤銷咗提名，最終參選無效。記協主席陳朗昇回覆Emily查詢時確認，噚日喺facebook專頁宣布參選嘅網媒「透視報」主編李敏妮（Sherry，圖），因提名不足而未能參選。

另有一人參選主席 提名有效

做咗多年記者嘅李敏妮噚日下晝約1點喺「透視報」facebook專頁宣布參選記協主席，仲話噚日朝早9點16分親身交咗提名表格同附上政綱，參選口號係「為傳媒堅持」，又圖文並茂製作5頁政綱。不過記協噚日公布，經核實後，李敏妮嘅兩個提名人中，有一人撤銷提名。記協噚日確認提名人嘅撤銷意向後，即時發電郵通知李要喺傍晚6點或以前補交提名，但限期前收唔到回覆，因此提名無效。其餘所有提名經記協覆核，確認有效。

記協會喺今個月22號舉行周年會員大會及執委會換屆選舉，選票會寄畀會員。早前宣布唔角逐連任嘅陳朗昇話，目前有足夠候選人，如順利當選可以避免記協停擺，而今次參選者當中，有4個係現屆執委會理事。佢又話有13人競逐10個理事職位，會有競爭。