【Emily】M記遇上走塑後…… 橙汁sizes走s

【明報專訊】首階段「走塑」4月22號實施，Emily發現，連鎖快餐店麥當勞喺差唔多同一時間開始無再供應細杯裝鮮橙汁，部分套餐要轉飲橙汁就要加4元買特大裝橙汁，變相「加價」。

Emily早排以27元買麥芝蛋包開心樂園餐，發現要加4元轉購特大裝橙汁，變相畀多咗近15%。其實麥當勞一向以細紙杯加膠杯蓋提供細橙汁，「走塑」實施後，其他大小嘅杯都轉晒另一款紙杯加紙杯蓋。

Emily向其中一間分店嘅店員查詢點解無咗細橙汁，店員透露係因為「走塑」後搵唔到合適嘅杯同蓋，又話唔知幾時會恢復供應細橙汁。各分店就繼續擺放舊有細紙杯喺自助飲水機畀客人斟水，但就無提供膠杯蓋喇。

麥當勞發言人回覆Emily時就無正面回應係咪同走塑有關，只係話麥當勞一直致力為顧客提供優質餐飲體驗，會不時檢視並更新產品組合，顧客請留意最新產品資訊。消委會話唔評論個別商戶嘅定價政策，但話飲食業界應喺「走塑」法例生效前預先做好準備，減低對消費者嘅影響。環保署就話個別餐廳點樣調整業務運作同選擇替代品餐具，屬於佢哋嘅商業決定。