【Emily】職訓局工程師會表揚 中電兩女將 獲頒傑出獎

【明報專訊】中華電力近年有唔少女性工程人員加入，其中見習技術員潘子榛及助理工程師吳卓詩，最近就獲職業訓練局及香港工程師學會分別頒發「傑出學徒」及「傑出見習工程師」獎項，肯定佢哋嘅表現。

獲職訓局頒發「2023年度傑出學徒」嘅潘子榛來自中電發電業務部，從超過230個參加者中脫穎而出，佢曾經做過飛機維修，現時主要參與龍鼓灘發電廠內機械設備嘅維修保養工作。獲工程師學會頒發「2023年度傑出見習工程師獎」第二名嘅吳卓詩大學畢業後，隨即加入中電做見習工程師，佢現時喺輸電及供電業務部負責變電站嘅設備維護工作。

中電：為未來培訓規劃注強心針

中電營運總裁唐連勝讚揚兩個年輕女工程人員表現優秀，為公司未來嘅培訓規劃工作注入強心針。唐又話，中電一直有透過專業及有系統嘅培訓計劃，為有志從事電力行業嘅年輕人裝備相關知識同技能，佢期望年輕工程人員保持學習熱情同堅持，積極增值自己，為香港供電服務貢獻。