【Emily】手機鏡頭矇查查 麥美娟求去濕良方

【明報專訊】民政及青年事務局長麥美娟噚日突然喺網上公開「求救」，原來佢部華為Huawei P30 Pro手機有問題，徵求高人解決方法。佢話前晚落大雨時用手機，結果鏡頭入水，佢並上載手機鏡頭嘅相，見到鏡頭玻璃內有水氣矇查查。佢話有人教佢用風筒吹，又有人叫佢將手機放入米缸就可以吸乾水氣，但佢話屋企無米缸咁點算？

局長有難多方支援，麥美娟喺facebook求助5小時，有60幾個留言提出各類方法，有人繼續建議佢將手機放入米缸，如果無缸，買包米返屋企放入米袋都得；有人叫佢用風筒吹吓、唞吓、再吹吓；有人話用防潮劑或抽濕大象，連同手機放入密封盒，但話明要等幾日；有人話開抽濕機抽一日就得；有人勸佢，快啲拎部機去旺角維修中心修理，唔好再搞咁多嘢喇。

有建議放米缸 有質疑解難能力

不過，有網民揶揄，話局長拎咁高人工，連點處理手機問題都唔識，仲要公開求助。有朋友就留言話，局長係時候換新電話，當中有人支持用華為新機，亦有人話係時候轉用生果品牌嘅手機喇。