【Emily】陳國基：達碳中和不能單靠政府

【明報專訊】政務司長陳國基噚日出席「環境及自然保育基金30周年綠續未來」啟動禮，佢致辭時話，隨住氣候變化不斷加劇，世界各地對環保工作嘅投入有增無減，政府將會繼續落實和完善各項環保措施，務求喺2035年前將碳排放從2005年水平減半，喺2050年達至碳中和；而要達至目標，單靠政府一己之力不足夠，更需要匯聚社會各界嘅智慧和力量，大家集思廣益。

另外，醞釀20多年嘅垃圾徵費暫緩，環境及自然保育基金由2015年起資助合資格團體推行廢物收費「社區參與」項目，宣傳都市固體廢物收費，不過近日有報道指有關居民唔覺有人宣傳。環境及自然保育基金委員會主席鄭錦鐘喺活動後會見傳媒時話，基金9年來一直資助唔同機構喺屋邨等範圍推廣，不過無可能接觸全港約700萬人，亦有市民會「左耳入、右耳出」。佢強調唔少參與者嘅減廢意識已有提升，雖然有市民唔贊成目前係實施垃圾徵費合適時機，但仍然支持，因此認為相關資助項目已達一定成績。

鄭又話，基金會要求受資助機構提交相關數據，包括每日回收廢物量及接觸戶數，而日後為不同資助項目制定指標時會與時並進。被問垃圾徵費暫緩後，基金會否繼續資助相關宣傳項目，佢話「未傾過」。