【Emily】端午金多寶 頭獎獨中5000萬元

【明報專訊】下星期一（10日）係端午節，馬會宣布六合彩端午金多寶會喺端午前夕嘅禮拜日（9日）攪珠，呢期會有3800萬元金多寶，若10元一注獨中，估計彩金高達5000萬元。端午金多寶噚晚開售，禮拜日晚9點15分截飛。

至於有咩心水冧巴，馬會就話近12次端午金多寶攪出次數最多嘅係「30」號，合共攪出5次，其次係「10」號，攪出4次。馬會又話，今個年度已舉行嘅6次金多寶攪珠中，有5個幸運兒係以複式獎券中頭獎嘅。

聽晚攪珠取消

講番噚晚攪珠嘅第64期六合彩，結果係6、11、19、21、27、43，特別號碼44，頭獎冇人中，二獎就兩注中，每注派超過74萬元，三獎71.5注中，每注派超過5.5萬元。馬會為預留更多時間畀公眾買端午金多寶，原定聽晚（禮拜四）攪珠就唔舉行嘞！