【Emily】享壽15 中大崇基貓Misha返天家

【明報專訊】中文大學校園唔難見到貓貓嘅蹤影。中大崇基學院神學院前日喺facebook出帖，話牧師白德培嘅15歲家貓Misha上個禮拜三開始失蹤，後來確認Misha離世「返天家」，感謝Misha多年來同中大人同悲同喜，陪伴多代人成長，願Misha同佢舊年病逝嘅貓媽媽Grisha喺天家重聚。

白德培（Tobias Brandner）亦撰文，提到近一年來，Misha身體虛弱並出現腎衰竭，形容Misha度過咗長壽及豐盛嘅一生。白德培亦回憶往事，話多年嚟唔知道Misha爸爸係邊個，只知係Grisha個女。佢一直當貓貓係佢家庭一部分，平時畀佢哋喺屋企或者校園內自由散步。

唔少中大人喺學院facebook留言，貼上Misha嘅舊照，有人讚Misha係一隻脾氣好、友善嘅貓咪，希望貓貓安息。