【Emily】風暴名稱增9個 「馬鞍」卸下 換上「青馬」

【明報專訊】天文台噚日公布，今年西北太平洋同南海嘅熱帶氣旋名單新增9個名，包括嚟自香港嘅「青馬」，代表青馬大橋，將取代舊有名字「馬鞍」。「青馬」喺天文台上年嘅「熱帶氣旋名字徵集活動」入面得票第二，反而票王「奶茶」未有入圍。

徵集活動票王「奶茶」落選

其餘8個新名包括「蜻蜓」、「道璣」、「坡鹿」、「阿穆丘」、「古莎莉」、 「核桃」、「沙布爾」同「浮蓮」，分別嚟自朝鮮、日本、老撾、菲律賓、韓國、米克羅尼西亞同越南。

根據慣例，颱風委員會會考慮將造成重大傷亡同經濟損失嘅熱帶氣旋除名，今次DQ嘅包括「尼格」、「馬鞍」、「圓規」、「軒嵐諾」、「馬勒卡」、「鮎魚」、 「奧鹿」、「雷伊」同「康森」。

睇番資料，2021年12月吹襲菲律賓嘅超強颱風「雷伊」造成406死65失蹤，超過1200人傷。颱風「圓規」同年10月吹襲菲律賓造成43死5傷、16人失蹤，超過50萬人須撤離，之後吹襲香港，天文台掛8號風球長達23小時20分，係歷來第五長嘅8號波。颱風「馬鞍」2022年8月吹襲菲律賓，造成3死4傷。至於「馬勒卡」因為喺其他語言有唔適當嘅意思而除名。