【Emily】故宮館明代名畫展 兩幅一級文物坐鎮

【明報專訊】古人面貌同生活民情靠住畫家嘅一筆一畫流傳後世。故宮文化博物館正舉辦「故事新說—故宮博物院藏明代人物畫名品」展覽，新展出21套由北京故宮博物院借出嘅明代人物畫作，包括屬於國家一級文物嘅《題竹圖》同《職貢圖》。

今次展覽由故宮文化博物館與北京故宮博物院合辦，按照明代早、中、晚期分為3個單元，展示宮廷畫家、文人畫家同職業畫家嘅藝術成就同創作歷程。展品涵蓋明代宮廷嘅「院體繪畫」、主要描繪世俗生活同風土民情嘅「浙江畫派」、風格清雅嘅「吳門畫派」、以畫風奇變著稱嘅「南陳北崔」。

市民入場更可以一覽兩幅國家一級文物畫作。仇英嘅《職貢圖》描繪唐代至明代邊疆部落同外國使臣向中原皇帝進貢嘅情况，細膩刻劃400多名使者同埋沿途嘅青山綠水；杜堇嘅《題竹圖》就繪畫北宋文豪蘇軾頭戴東坡巾喺竹上揮毫題詩，兼融院體繪畫嘅工穩勁健同文人繪畫嘅典雅秀逸。展期由即日起至9月1日結束。