【Emily】消防處探獨居雙老 派「防火三寳」

【明報專訊】消防處喺今年4月開始同社福機構及長者中心合作，展開「家居防火安全探訪（試行計劃）」，探訪獨居同雙老長者，評估佢哋屋企嘅防火安全，宣揚應對火災嘅方法，仲會派發「防火三寳」。

高級消防隊長鄭建威話，呢次試行計劃會探訪觀塘順安邨嘅獨居同雙老長者，為期一年，每月探訪12戶，即全年共144戶，每次會有兩個消防員同埋一個社福機構社工一齊去探訪。

助消除火警隱憂 裝偵測器

助理消防區長嚴英傑就話試行期後會檢討成效，再考慮會唔會擴展去到其他地區，延續關愛共融精神。

鄭建威又話，探訪時會同啲長者傾偈，了解佢哋平日嘅生活習慣，幫手評估同消除屋企嘅火警隱憂。消防員又會為長者提供防火意見同消防安全教育資訊，仲會派發「防火三寳」，即係滅火筒、滅火氈、獨立火警偵測器，亦會幫長者安裝火警偵測器。

參加者黃婆婆話好感激消防處推出呢個計劃，唔單止可以令長者感到受關懷，仲可以增加佢哋嘅防火知識同令佢哋提高警覺，例如知道點樣防火同點樣用「防火三寳」。