【Emily】亞洲物理奧林匹克 港生奪1金3銀

【明報專訊】噚日政府公布，有8個學生代表香港去咗馬來西亞參加第24屆亞洲物理奧林匹克，一共贏得1金、3銀、2銅同2個優異獎，成績卓越。賽事喺今個月3至10號舉行，有超過200個來自27個國家或城市嘅學生參加。

奪金嘅同學係來自沙田學院嘅劉暢；3名銀牌得主則分別係播道書院嘅梁至鋒、皇仁書院嘅傅思皓、伊利沙伯中學嘅甄璟堯；香港四邑商工總會黃棣珊紀念中學嘅梅樂天、聖若瑟書院嘅唐銘蔚就各贏一面銅牌。另外，保良局蔡繼有學校嘅潘俊彥、香港中國婦女會中學嘅陳愷知就各獲優異獎。

教育局長蔡若蓮祝賀港隊表現優秀，話局方會繼續喺中小學大力推動STEAM（科學、科技、工程、藝術、數學）教育，包括進一步推動學校建立校本學生人才庫，加強識別同培育更多STEAM精英。