【Emily】藝發局停資助 鮮浪潮：非不尋常

【明報專訊】創辦18年嘅「鮮浪潮國際短片節」首次冇攞到藝術發展局資助，規模都比上年縮小，放映影片由38部減到24部。鮮浪潮電影節話，自第11屆開始，鮮浪潮成立有限公司並行政獨立，亦逐步財政獨立，指藝發局最終停止資助「並非不尋常」。

今屆規模縮小

藝發局噚日回覆Emily話，鮮浪潮短片節自第11屆開始，獲前民政局嘅「藝術及體育發展基金」透過藝發局批出「五年過渡期」資助，以支持當時成立嘅鮮浪潮電影節有限公司未來能獨立發展，後來延長咗兩年至第17屆，喺舊年9月已完成佢哋畀嘅資助。藝發局補充話，歡迎任何合資格人士或機構申請資助。

根據節目指南，今屆短片節除作品數量減咗，節目同主題亦由12個減到7個。鮮浪潮話規模縮小係因為仍處於財政調整期，又話如有任何合適計劃，仍會申請藝發局資助，同尋求唔同嘅資助。至於來屆嘅本地競賽事宜，會喺今屆結束後宣布。

翻查資料，第15同16屆鮮浪潮短片節曾有短片因未獲電檢處發出「核准證明書」，最後取消放映；上屆就有短片被頒令需刪剪部分片段。