經濟
網媒：澳門政府要求博企叫停免費餐飲
【明報專訊】內地遊客「窮遊」香港嚟打卡，大家就聽得多。一海之隔嘅「梳打埠」唔同賭場原來亦出招提供唔同免費特色餐飲小食留客，引起內地網紅同「小紅書」教路零元遊澳，引起澳門民眾反彈同關注到影響中小企經營。網上博彩媒體《亞博匯》報道引述消息放風話，澳門政府要求博企叫停免費供應餐飲。
市民關注「窮遊」影響中小企
姑勿論係唔係真，博企供應嘅小食餐飲真係幾有特色。例如金沙中國（1928）嘅巴黎人賭場內，除咗有免費汽水及奶茶，仲可以喺特定時段享用金箔軟雪糕，派完即止。永利澳門（1128）旗下娛樂場就提供免費茅台拿鐵；美高梅中國（2282）旗下賭場派免費珍珠奶茶。巴黎人嘅金箔軟雪糕，仲要係軟包托底，咪話唔滋味，好難怪中外遊客同本地薑都排長龍試試。幫唔幫到賭收小琴就真係唔知，但肯定識途老馬會流連忘返。
不過噚日澳門旅遊局代局長程衛東喺澳廣視節目回應市民指就算社交網站有人教拿免費小食，旅客人均消費仍然上升。小琴仲八到過大海嘅朋友話，噚晚啲賭場繼續有免費嘢飲未叫停住。話唔定爆出停免費餐飲嘅新聞，會谷高過來享受最後免費餐飲嘅人流都唔定。
