【Emily】深圳文博會延展 元創方賞青花瓷奶樽、巴士機械人

【明報專訊】香港上個月首次參加深圳文博會，相關展品噚日開始喺中環元創方THE QUBE展出，現場會有由9個香港藝術家同9個香港本土品牌創作嘅約300件文創作品，分為4個展區，包括街畫、藝術玩具及線上遊戲、中國元素同文創產品。展覽今日同聽日繼續，時間由早上11點至晚上8時。

設計師許開嬌以明朝嘉靖皇帝登基500年生日派對為創作靈感，製作咗大型青花瓷作品《皇的派對》。原展品共有超過500件物品，今次展出其中約100件，除咗青花瓷碗碟之外，仲有青花瓷生日蛋糕、手機、奶樽等現代物品。原來嘉靖帝嘅仔女大多命途不濟，許開嬌就話特登設計一啲小朋友鍾意嘅嘢，以圓嘉靖皇帝兒孫滿堂嘅夢想。

插畫家、玩具設計師葉偉青嘅作品就關注香港事物同交通工具，將巴士、重機、垃圾桶等繪畫成機械人，再同玩具公司合作設計成文創玩具。佢希望藉此保育香港文化，「例如安全島燈箱，香港已經愈嚟愈少，而我畫成機械人後就有更多人留意」。

呢個「文創無界」展覽嘅策展人梁冠文話，希望展品返到主場香港展出之後，可以令香港人見到香港設計師嘅作品有幾優異。