【Emily】助理關長吳潔貞突辭職

【明報專訊】據Emily了解，服務海關近30年嘅助理關長（邊境及港口）吳潔貞（圖）早前突然請辭，4月已離開海關。Madam吳離職前一個月，助理關長（情報及調查）胡偉軍「升正」做副關長（管制及執法），引起海關內部討論Madam吳辭職原因。

翻查憲報，Madam吳2020年3月服務夠25年，獲頒「香港海關長期服務獎章—第一加敍勳扣」，換言之佢係1995年加入海關；而胡Sir就2022年7月獲頒同一勳扣，計番即係1997年加入海關，年資較淺。內部就關注Madam吳係唔係因為升遷問題辭職。Emily問海關Madam吳辭職嘅原因，發言人就話「不作評論」。

Madam吳2019年擢升助理關長，先後擔任助理關長（情報及調查）同助理關長（邊境及港口），曾參與疫後通關工作，2022同2023年多次以署理副關長身分出席活動，離職後助理關長就由朱沛傑接替。至於胡Sir就2021年升任助理關長（情報及調查），曾參與抗疫工作，今年3月再晉升，3年內連升兩級，未來接替關長一職被看高一線。