經濟
濠賭被要求停免費小食 十六浦：改用積分
【明報專訊】澳門有唔少賭場為留客而提供免費餐飲小食，引嚟內地網紅同社交平台「小紅書」教路「零元遊澳」，但最近據博彩媒體《亞博匯》引述消息話政府要求賭場唔好再免費供應餐飲。實德環球（0487）副主席馬浩文噚日見媒體就話集團旗下賭場十六浦已經停止供應免費小食，改為需要使用積分，或以會員優惠等方式換領。
點解會話政府想叫停免費餐飲小食？因去澳門賭場真係一蚊都唔使就可以食到飽，仲要款式多。實德環球旗下十六浦除有免費豬扒包、奶茶，註冊成會員仲可額外得到叉燒蛋飯！你話，有免費美食供應，遊客點會肯花錢買，仲要而家咁多「特種兵」（最短時間內以最少費用去旅行）進攻澳門，當地中小店經營真係嗌救命。
不過，馬浩文唔擔心取消免費供應餐飲小食令人流有所減少，因澳門仲有其他盛事吸引旅客訪澳從而帶動整體賭場人流。佢又講6月為傳統淡季，賭收以往會回落約一成，但預計今個月只會跌單位數，而且隨深中通道投入服務，澳門橫琴聯遊發展，相信有助澳門整體旅遊業。
email: [email protected]
