【Emily】回應市民批評的士服務差 「的士大王」之子歸因司機收入唔高

【明報專訊】唔少市民批評香港的士司機濫收車費、態度差，政府推出的士車隊制度，預計下月公布車隊牌照申請結果。「的士大王」伍熀之子伍海山（圖右）話，的士司機入息低於商用車司機嘅中位數，收入唔高，所以開工時難免為咗「追數」而心情急躁，「始終揸車都係想搵食，都係想養妻活兒養家」，又話估計收入問題影響司機入行意欲。

民建聯立法會議員梁熙（圖左）噚日喺網上頻道《梁熙會客室》訪問伍海山，伍話「黑的」都係想搵多啲錢，如果收入達一定水平，相信大部分人都唔會以身試法，並強調𠵱家只有一小撮人明知故犯，「來來去去都是那些的士車牌」，指警方已掌握資料。Emily翻查立法會文件，去年運輸行業收入中位數約2.5萬元，市區的士司機嘅平均收入約2萬元。

稱與乘客爭拗因溝通問題

另外，伍海山認為的士司機同乘客發生爭拗主要係溝通問題，例如司機交更時原本唔打算接單，但為咗做多啲生意，就會睇吓目的地順唔順路，當知道唔順路時就畀人一種「拒載」嘅感覺，亦明白對乘客嚟講唔理想。佢認同的士車隊制可改善司機態度，又指網約平台係時代發展嘅產物，只要發揮好中介角色，就有助減少「人等車」、「車等人」嘅情况。