【明報專訊】市區又有蛇出沒，繼上星期沙田有戲院驚現蛇蹤後，噚日朝早港鐵車廂出現一條約40厘米長、黑白間條嘅蛇，警方喺金鐘站上車處理，並搵蛇王捉走條蛇，車上乘客就被安排轉搭下一班車，其間港鐵運作無受影響。警方話蛇王確認條蛇係加州王蛇，唔係本地品種，亦無毒性。
噚日朝早7點37分左右，警方接報話港鐵車廂有蛇。港鐵回覆Emily話，職員收到乘客報告喺荃灣線往中環方向嘅列車近車門位置發現一條蛇，於是報警。車務控制中心安排車上乘客喺金鐘站落車，轉搭下班列車。警方其後上車處理，將蛇捉走帶離車站。
據了解，警方之後將蛇帶返中區警署，稍後會送去嘉道理農場處理。
