【Emily】西瓜節推介細瓜 周五開鑼

【明報專訊】一年一度嘅「本地有機西瓜節」周五（21日）起一連4日朝10晚6喺青衣城一期舉行，漁護署今年再推介上年4個品種嘅有機西瓜，各款嘅甜度大約係10至12度，而一般本地有機西瓜嘅甜度就介乎8至12度。喺會場選購西瓜嘅市民可獲精美環保袋，送完即止，現場仲設有攤位遊戲同工作坊𠻹！

4款推介西瓜分別係「皇玉」、「無籽3F-2728」、「超甜黑美人168」同「黛安娜」，其中漁護署上年先推介嘅「皇玉」呈小球形，果皮綠色帶深色條紋，清甜爽脆，甜度約10度；甜度相同嘅「無籽3F-2728」亦呈小球形，果皮綠色帶深色條紋，果肉呈紅色多汁；呈橢圓形嘅「黛安娜」果皮鮮黃帶斑條，甜度約11度；「超甜黑美人168」甜度約12度。

漁護署農業主任（園藝）王敏維話，近幾年推介嘅本地有機西瓜偏細，重約1至2公斤，同一般喺超市出售、6至7公斤重嘅大型西瓜唔同，較適合本地小家庭選購。

市民除可以喺會場選購，呢個月下旬起亦可以去其餘8個農墟選購本地有機西瓜同其他時令蔬果，仲可透過「本地魚菜直送」網頁及手機應用程式向蔬菜統營處訂購。