【Emily】馬會捐錢開8社區藥房 料助11萬人

【明報專訊】香港賽馬會慈善信託基金捐咗超過4.15億元，推行為期5年嘅「賽馬會藥健同心藥物支援網絡」，喺多區設立社區藥房。計劃目的係擴大社區藥房服務範圍，支援慢性疾病同輕微疾病患者，提供可負擔嘅配藥服務，並由藥劑師為病人同照顧者提供免費藥物諮詢，有需要時仲會轉介畀其他醫護人員。計劃預計服務超過11萬人，仲為超過5400名專業人員提供培訓。

支援網絡內共有8間由社福機構營運嘅社區藥房，分佈港九新界。計劃免費提供嘅藥物諮詢同評估服務，包括整合藥物紀錄、檢視藥物用途及副作用等，仲會根據病人需要訂立健康同藥物管理計劃。

計劃亦同港大、中大合作，港大會制定社區藥房運作指引，提供人才培訓同評估成效，中大除咗培訓人才，仲會舉辦一系列公眾教育活動，推廣藥物知識。

醫衛局常秘陳松青、馬會慈善及社區事務執行總監梁卓偉、港大醫學院院長劉澤星噚日擔任計劃啟動禮主禮嘉賓。梁卓偉致辭時話藥劑師係基層醫療不可或缺嘅一環，藥物管理對長者好重要，希望透過計劃為包括藥劑師在內嘅醫護增值。