【Emily】廠商會90周年 下年辦新能源車展

【明報專訊】廠商會今年創會90周年，其最為人熟悉嘅活動應該係一年一度嘅工展會，近年又去澳門舉辦，廠商會話展覽服務一向係該會強項之一，下年5月仲會同其他團體喺亞博館合辦大型國際汽車展，以新能源汽車為主題，初步全部內地有生產新能源汽車嘅品牌都答應參展，仲有歐洲嘅跑車製造商有意參展。

至於今年嘅工展會，廠商會副會長施榮恆話，到時會有個大型生日蛋糕畀市民打卡留念，又會向更多基層市民發放現金券，畀佢哋喺工展會消費。

除咗舉辦展覽，工展會會推出90周年展覽，並製作90周年紀念冊輯錄過去嘅歷史相片，另一副會長莊家彬話，廠商會每年都會組團上京，製作紀念冊就係會見港澳辦主任夏寶龍時由對方提出嘅，所以希望下半年再訪京時可以帶埋紀念冊送畀夏寶龍。