【Emily】11萬長者未轉樂悠咭 將設8臨時中心助申請

【明報專訊】年滿60歲嘅香港居民由8月25日起必須使用「樂悠咭」以享用兩蚊搭車優惠，不記名長者八達通同一般個人八達通將不再適用。為協助老友記申請，政府噚日宣布將設立8間樂悠咭臨時申請服務中心，下周一（24日）起運作至8月31日。未滿60歲嘅合資格殘疾人士就仍可使用已加註「殘疾人士身分」嘅個人八達通繼續享用優惠。

副勞福局長何啟明噚日喺港台《千禧年代》話，尚有約8%、即約11萬合資格長者未申請轉用樂悠咭，大部分係80歲以上，另有6000幾名殘疾人士亦未轉用。

佢話當局已處理130多萬份申請，並提到有約4萬人住喺安老院，較少外出，會派員到院舍協助長者申請換領，同埋以現有網絡接觸合資格殘疾人士。