【Emily】考察深中通道 港旅界大橋打卡

【明報專訊】連接深圳同中山嘅深中通道今個月底正式通車，旅遊界立法會議員姚柏良噚日同多個旅行社、酒店及航空業界商會，舉辦體驗考察團試行深中通道，包括行經深中隧道、深中大橋，仲去到深中通道西人工島，聽當地工程人員詳細講解兼「打卡」；中午就喺中山市文化廣電旅遊局出席午餐會，同當地旅遊業界交流。

姚柏良話，深中通道進一步推進珠江兩岸互聯互通同大灣區一小時生活圈，方便平日要往返香港及中山嘅市民，亦對兩地旅遊業，以至灣區整體經濟帶來好大發展動力。

佢提到，早前新增10個赴港個人遊嘅內地城市，多數喺內陸北部，以長途客為主，而今次考察團畀機會香港同中山嘅旅遊業界接觸，以便日後一齊打造更多「一程多站」嘅產品，吸引機場旅客都可以用深中通道往返內地。