【Emily】捐300萬及趙無極畫作拍賣 梁朝偉資助兒童獎學金

【明報專訊】香港兒科醫學會上年成立「鵬程奮進堅毅獎學金」，支援長期病患、有特殊學習需要或基層家庭兒童及青少年，而今年將會擴大規模。擔任獎學金發言人嘅影帝梁朝偉話，上年有百幾人報名，只有20個人得獎，為攞唔到獎嘅小朋友感到難過，反問「咁咪有百幾個人好失望」，於是捐出300萬元，並捐贈一幅已故華裔藝術家趙無極嘅畫作用嚟拍賣籌款，希望可以發揮帶頭作用，畀更多人關注有需要嘅兒童。

梁朝偉噚日喺商台節目《政好星期天》認為，上年得獎嘅小朋友好正面，例如有小朋友將部分獎金捐畀母校，令佢覺得好感動。佢亦勉勵年輕人唔好因為失敗而有負面情緒，舉例話自己攞獎比率可能得8%、9%，即係九成幾時間都係失敗，不過佢會視之為人生經歷，最重要係搵到個人目標同熱誠。

自言九成幾時間都失敗

勉青年勿因失敗而負面

港大醫學院兒童及青少年科學系臨牀教授葉柏強出席同一節目時話，今屆每份獎金由1萬元加碼到1.5萬至2萬元，得獎名額亦由20個增加到120至150個，希望鼓勵兒童發揮潛質。