【Emily】飛越啟德慈善跑 三代同堂再接力

【明報專訊】一連兩日喺荃灣D．PARK舉行嘅「飛越啟德100KM跑步機慈善挑戰賽2024」噚日結束，有超過600名跑手同運動員參與。大會話，出年啟德體育園啟用後，個比賽活動就會移師到園區內舉行。

明年移師啟德體育園

比賽由飛越啟德主辦、啟德體育園協辦，設唔同組別，噚日到兩代及三代同堂親子及100公里跑組。45歲嘅駱華邦同73歲嘅爸爸駱炳明、13歲嘅囝囝駱璟濤第二年參加三代同堂接力賽；駱華邦話佢一家熱愛跑步，經常練跑，佢放工仲會由西灣河跑返西營盤。

駱華邦同爸爸經常參加馬拉松賽，佢已經參加過62個馬拉松，爸爸亦已跑過40多個馬拉松賽。駱炳明係全場最年長跑手，佢話原本想參加100個馬拉松比賽，但舊年因腳傷而休養一年，𠵱家心態係開心享受跑步，唔再認真追求比賽，又話毋懼年齡所限，打算一直跑落去，冇言休期限。