【Emily】中大校刊訪8校友 盼展「最美風景是人」 金耀基憶「香港女兒」 丘成桐「失文憑」獲友誼

【明報專訊】 中文大學最近出版新一期校刊，收錄咗8名唔同年代嘅中大人專訪，包括前校長金耀基及數學家丘成桐等名人校友，由眾人口中勾勒出中大經歷一甲子嘅變遷，亦希望展現出「中大最美的風景是人」。

訪問提及唔少學術界名人，包括1970年加入中大任社會學教師、曾任大學校長嘅社會學家金耀基。金耀基憶述2002年接任校長，兩年任期，佢形容係「任重道不遠」。上任無耐SARS來襲，多名中大人喺醫院因抗疫染病，其間自動請纓上前線救人嘅謝婉雯醫生不幸離世，金耀基喺悼念會上形容謝係「香港的女兒」，金嘅悼辭隨後被廣泛引用；SARS後經濟蕭條，大學財政被削資5000萬美元，金因而重整學系，惹來部分中大人不滿，但佢為幫助中大渡過難關，自問無愧於心。

畢業於1969年嘅數學家丘成桐就喺校刊透露，自己仍未取得大學學位，就已獲美國柏克萊取錄深造，並獲獎學金，「結果（大學）畢業禮時，我無法畢業，畢業典禮亦無法參加。（時任崇基學院院長）容啟東決定在書院畢業禮向我頒授文憑，所以我有崇基文憑而沒有大學文憑」。丘成桐話唔在意一紙證書，喺中大收穫更多係人情味同友誼。