【Emily】Ocean Park開水上Party 50活動迎暑假

【明報專訊】連日天氣酷熱，唔少人都會去玩水消暑。海洋公園（Ocean Park）水上樂園噚日宣布，會喺下月6日至9月1日舉行全港最大型水上派對「暑假狂熱Party Time」，提供超過50項活動，包括水戰遊戲、水上滑梯、衝浪示範等。

適逢下月26日巴黎奧運開鑼，派對亦加入奧運元素，喺兩個海浪池舉辦水上排球、水上籃球及水上拔河等運動項目，仲會喺大屏幕播放奧運賽事畀大家一齊觀戰。另外，現場亦有由巨型水泡變身成樂器嘅「水鼓狂歡表演」，仲有狂舞表演等。

海洋公園主席龐建貽話，今年首5個月佢哋嘅非本地旅客數量按年有1.5倍增長，形容好似「強心針」咁起咗好大嘅刺激作用。佢又話，旅客增長有賴政府嘅政策，例如內地近月開放多8個城市可以到港澳自由行，佢期望有更多自由行城市，有助香港旅遊業復蘇。