經濟
摩通：港人居所細 山姆對港零售影響可控
【明報專訊】內地大型超市山姆本月推出直郵香港服務，雖然個個都話影響本地零售業，不過大行摩通就話無有怕！摩通最新報告認為山姆對本地零售影響可控，大概只佔香港整體零售額少於1%，但仍對香港零售額持謹慎態度，預期全年撇除餐廳嘅零售額將按年跌6%。
摩通一共選取11個樣本，比較山姆、阿里（9988）旗下淘寶同本地超市惠康價格，發現山姆同淘寶比起惠康分別平33%及29%；不過計埋運費同會員費，山姆同淘寶就分別平17%同6%。摩通認為山姆影響可控原因如下，首先係產品供應有限；同埋精明購物者一早用緊淘寶同拼多多（美：PDD）；最重要嘅係，雖然山姆賣得平，但大部分需要大量入貨，香港消費者或要同其他人分，加埋屋企細未必夠位，好大機會成為重複購買障礙。
其實山姆由周一開始，所有食品及飲品都未能送港，其他家居用品同電器等就唔受限制，客服解釋由於海關調整商品管理政策，令部分商品暫時無法選購。如果食品同飲品未來都無法直送香港，最後可能只係「雷聲大、雨點小」。
email: [email protected]
