【Emily】撐七一優惠 卓永興張國鈞曾國衞約埋食燒味

【明報專訊】政府同商界趁七一推出多項優惠活動，各司局長紛紛響應落區消費，其中署理政務司長卓永興、副律政司長張國鈞、政制局長曾國衞就一齊去咗灣仔一間提供「七一折」嘅燒臘店食飯，不過有網民留言話佢哋碟碟都係肉，無啖蔬菜，唔多健康。運輸及物流局長林世雄就去視察輕鐵嘅免費服務，坐咗多啦A夢主題列車，仲攞住一份試卷同列車合照，原來係因為有人話佢同卡通入面大雄嘅老師有幾分似樣。

超過2000間食肆喺七一推優惠，卓永興、張國鈞同曾國衞到灣仔鵝頸熟食中心一間燒臘店食午飯，大嚼燒味、咖喱、滷味等，不過有眼利網民留意啲食物，留言「一條菜都冇，唔健康」。張國鈞就留言回覆「後來點咗碟蠔油菜心，不過冇影到啫」。

林世雄坐多啦A夢輕鐵 扮大雄老師打卡

多種交通工具噚日都有優惠，包括搭輕鐵同港鐵巴士免費。林世雄去咗屯門輕鐵車廠參觀，了解免費服務運作情况。運物局喺facebook話，有人認為多啦A夢角色大雄嘅老師，同林世雄有幾分似樣，唔知大家又覺唔覺？

多個政府博物館同康體設施噚日免費，創科局長孫東就去咗太空館參觀，仲同在場嘅小朋友興奮合照。律政司長林定國就同太太去參觀大坑火龍文化館。