【Emily】獲金紫荊憶考評局工作 容永祺：疫時辦DSE富挑戰

【明報專訊】政府噚日公布502人受勳名單，好多政商界人士有份，其中獲頒金紫荊星章嘅考評局主席容永祺就話，感謝政府對佢工作嘅肯定，佢接受商台訪問時仲自豪咁話，喺新冠疫情期間，考評局工作充滿挑戰，但話因為考評局做得好，香港成為當時全球極少數能辦公開試嘅地方，仲話其間無一個學生染疫，亦安排確診同要檢疫嘅學生去竹篙灣社區隔離設施考試，工作極富挑戰。

今次獲大紫荊勳章嘅5人分別係建制派「班長」立法會議員廖長江、全國港澳研究會顧問劉兆佳、港大榮休教授兼饒宗頤學術館長李焯芬、恒基地產主席兼董事總經理李家傑、香港福建社團聯會榮譽主席林樹哲。李家傑話十分感謝政府，非常榮幸為國家及香港服務，亦感謝社會各界、家人同集團所有人嘅支持，將繼續與各界同心協力，全力支持國家及香港實現更美好發展、共建更美好家園。

獲頒金紫荊星章嘅立法會議員梁美芬就認為，今次係政府認同佢喺推動研究內地法制同《基本法》嘅工作，對此感到高興。

獲銅紫荊星章嘅全國人大代表陳曉峰就話， 懷住謙卑之心，感謝政府對佢多年工作嘅肯定，佢話自己一直推動國際經貿往來、法治教育、創科生態、栽培年輕人等，未來一定會繼續努力。