【Emily】日內瓦經貿辦慶回歸酒會 美澳代表到場

【明報專訊】政府近年同某啲西方國家喺某啲議題上睇法唔同，不過經貿上仲有得傾。香港駐日內瓦經貿辦上禮拜三（6月26日）舉辦酒會慶回歸，政府話有超過150個駐世貿代表、商界及學界等代表出席，除咗中國常駐聯合國日內瓦辦事處代表陳旭，仲包括大使級嘅歐盟同日本常駐世貿代表。

根據政府發布嘅相片，美國、澳洲等代表都有出席摸下酒杯底，特區常駐世貿副代表關曉陽都有同美國、以色列、澳洲、歐盟、哥斯達黎加等代表喺酒會上合照。

香港駐世貿常設代表蘇婉玲重申，香港一直堅信自由貿易，堅定支持以世貿組織為核心嘅多邊貿易制度。佢話，從來賓笑臉睇到有相同信念嘅朋友，「我們都相信如果多邊主義繼續蓬勃發展，世界將會變得更加美好」。

另外，身兼海運港口局主席嘅運輸及物流局長林世雄今日會率領海運港口局成員訪問東京，會同日本企業、海運業界組織會面，介紹香港高增值海運，亦會同當地官員會面。林世雄係過去兩年第3個訪問日本嘅局長。